വേള്ഡ് അസോസിയേഷന് ഓഫ് ന്യൂസ് പേപ്പേഴ്സ് ആന്ഡ് ന്യൂസ് പബ്ലിഷേഴ്സിന്റെ (വാന്-ഇഫ്ര) യങ്റീഡര് പ്രൈസില് മാതൃഭൂമിക്ക് പ്രത്യേക പ്രശംസ. കേരളത്തിലെ ആയിരക്കണക്കിന് വിദ്യാലയങ്ങളില് നടപ്പാക്കുന്ന സീഡ്പദ്ധതിയാണ് മാതൃഭൂമിക്ക് ഈ അംഗീകാരം നേടിക്കൊടുത്തത്. പൊതുസേവന വിഭാഗത്തില് അവാര്ഡ് നിര്ണയസമിതിയുടെ പ്രത്യേക പ്രശംസയ്ക്കാണ് മാതൃഭൂമി സീഡ് അര്ഹമായത്. ലോകത്തെ വിവിധ ഭാഗങ്ങളിലുള്ള പതിനെട്ടായിരത്തിലധികം പ്രസിദ്ധീകരണങ്ങളെയും പതിനയ്യായിരത്തിലധികം ഓണ്ലൈന് സൈറ്റുകളെയും മൂവായിരത്തിലധികം കമ്പനികളെയും പ്രതിനിധീകരിക്കുന്ന രാജ്യാന്തര സംഘടനയാണ് വാന്-ഇഫ്ര.
വിദ്യാര്ഥികളില് പ്രകൃതിസംരക്ഷണത്തിന്റെയും പരിസ്ഥിതിബോധത്തിന്റെയും പ്രാധാന്യം എത്തിക്കുകയാണ് ഈ കര്മപദ്ധതിയുടെ ദൗത്യമെന്ന് അവാര്ഡ്നിര്ണയസമിതി കണ്ടെത്തി. ബൃഹത്തായ ഈ പരിസ്ഥിതി പ്രസ്ഥാനത്തിനായി മാതൃഭൂമിയും പദ്ധതിയോട് സഹകരിക്കുന്ന മറ്റുള്ളവരും നടത്തുന്ന യത്നം പ്രത്യേക പരിഗണന അര്ഹിക്കുന്നതാണെന്നും വിധികര്ത്താക്കള് ചൂണ്ടിക്കാട്ടി.
മഹത്തായ ലക്ഷ്യങ്ങള്ക്കുവേണ്ടി പ്രവര്ത്തിക്കാനും ശക്തമായ കൂട്ടായ്മകള് സൃഷ്ടിക്കാനും മാതൃഭൂമിയുടെ ഈ യത്നം മറ്റു പത്രങ്ങള്ക്ക് മാതൃകയാകുമെന്നും സമിതി അഭിപ്രായപ്പെട്ടു. വാന്-ഇഫ്ര യങ് റീഡര്ഷിപ്പ് ഡെവലപ്പ്മെന്റ് എക്സിക്യൂട്ടീവ് ഡയറക്ടര് ആര്ലിന് മക്മെയിനിന്റെ നേതൃത്വത്തില് വിവിധ രാജ്യങ്ങളില്നിന്നുള്ള വിദഗ്ധരടങ്ങിയ പതിനൊന്നംഗ സമിതിയാണ് അവാര്ഡ്നിര്ണയം നടത്തിയത്.
ബുധനാഴ്ച വിയന്നയില് നടക്കുന്ന വേള്ഡ് ന്യൂസ്പേപ്പേഴ്സ് കോണ്ഗ്രസ് ആന്ഡ് വേള്ഡ് എഡിറ്റേഴ്സ് ഫോറത്തില് മാതൃഭൂമി മാനേജിങ് ഡയറക്ടര് എം.പി. വീരേന്ദ്രകുമാറും മാനേജിങ് എഡിറ്റര് പി.വി. ചന്ദ്രനും ചേര്ന്ന് അവാര്ഡ് ഏറ്റുവാങ്ങും. ഇതുവരെയായി അയ്യായിരത്തിലധികം സ്കൂളുകള് സീഡ് പദ്ധതിയില് അംഗങ്ങളായിട്ടുണ്ട്. മാതൃഭൂമിയിലെ ജീവനക്കാരുടെയും പദ്ധതിയില് അംഗങ്ങളായ വിദ്യാര്ഥികളുടെയും കോ-ഓര്ഡിനേറ്റര്മാരായ അധ്യാപകരുടെ നേതൃത്വത്തില് ഊര്ജസംരക്ഷണം, ജലസംരക്ഷണം, പ്ലാസ്റ്റിക് മാലിന്യനിര്മാര്ജനം, ജൈവവൈവിധ്യസംരക്ഷണം തുടങ്ങി വിവിധപ്രവര്ത്തനങ്ങള് സ്കൂളുകളിലും പുറത്തുമായി നടത്തി.
ഇതിലൂടെ തങ്ങളുടെ വീടുകളില് വരെ സീഡ് പ്രവര്ത്തനങ്ങള് നടപ്പാക്കാന് വിദ്യാര്ഥികള് പ്രേരിതരായെന്നും അവാര്ഡ്നിര്ണയസമിതി കണ്ടെത്തി. 20 ലക്ഷത്തോളം രൂപയാണ് മികച്ച പ്രവര്ത്തനം നടത്തിയ വിദ്യാലയങ്ങള്ക്ക് കാഷ് പ്രൈസായി നല്കിയത്. വിന്ടെക് പബ്ലിക്കേഷന്സ്, ആലുവ പരിസ്ഥിതിസംരക്ഷണസംഘം എന്നിവയുടെ സഹകരണത്തോടെയാണ് മാതൃഭൂമി സീഡ് പദ്ധതി നടപ്പാക്കുന്നത്.
No comments:
Post a Comment